LAOAG CITY – Nagsagaba ti sumagmamano a sugat ti maysa nga ina kalpasan a binagko-bagkong ti anak na a menor de edad a lalaki iti Barangay 2 ditoy ciudad ti Laoag.
Basar iti inisyal nga impormasyon, binagbagaan ti ina ti agtawen ti 14 nga anak na a lalaki a masapol nga agadal a nasayaat ken saan unay a makibarbarkada.
Nupay kasta, maipagarop a kinagura daytoy ti menor edad a nangtungpal ti panangbagko-bagkong na iti bukod na nga ina babaen ti panagusar na ti kutsilyo nga agatiddog ti pito a pulgada.
Gapu iti daytoy, nagsagaba ti biktima ti dua a sugat iti buksitna ken maysa iti baba ti akin-kannigid a barukong na.
Mainaig iti daytoy, nagpukpukkaw ti ina tapno agpaarayat iti anak na a babai a menor de edad a kadwa da iti balay da ken dagiti karruba da.
Iti panagturong ti news team ti Bombo Radyo Laoag iti lugar, naamoan nga idi nabagkong ti menor de edad iti ina na ket nakataray paylaeng ti biktima tapno agkiddaw ti tulong, no sadinno nga iti dayta a gundaway ket isu metten ti iyaasideg dagiti karruba da, ken mismo a ti ubing a babai ti napan nangilukat iti ridaw tapno makastrek dagitoy.
Naitaray met a dagus ti biktima iti Governor Roque Ablan Senior Memorial Hospital ditoy ciudad ti Laoag para iti naan-anay a pannakataming na nga ita ket addan iti natalged a kasasaad.
Natiliw met dagiti nagresponde a pulis ti nasao a suspek ngem inpaima da daytoy iti City Social Welfare and Development ditoy ciudad ti Laoag gapu ta menor de edad paylaeng.
