LAOAG CITY – Natay ti maysa a menor de edad a lalaki kalpasan a nalmes iti karayan iti paset ti Barangay Lacuben iti ili ti Badoc.

Ti biktima ket agtawen ti 11 ken residente iti Barangay Alay iti nadakamat nga ili.

Basar iti Philippine National Police iti ili ti Badoc, nagturong ti biktima kadwa na ti pamilya na iti nasao a karayan tapno agpipicnic idi Biernes Santo.

Nupay kasta, bayat ti panagdigdigos ti biktima kadwa na ti maysa pay a menor de edad ket naikabil da iti adalem a paset ti karayan a nangitunda metten iti pannakalmes na.

Ginandat dagiti kakadwa ti biktima nga isalakan daytoy ken intaray da iti  Sto. Cristo Hospital, Sinait, Ilocos Sur ngem naideklarar a dead on arrival.

Inbatad ti attending physician a ni Dr. Joyce Kristelle Yabes Tolentino a ti nakatayan ti biktima ket Asphysia Secondary to Drowning.