LAOAG CITY – Natay ti maysa a menor de edad kalpasan a nalmes iti dam idiay Barangay Nagtrigoan iti nasao nga ili.
Nabigbig ti biktima a ni Janlee Benedict Rinen y Marsan, agtawen ti 13, Grade 8 ken residente iti Barangay Pagdilao iti ili ti Pinili.
Segun ken ni Police Capt. Jeffrey Taccad, ti chief of police iti ili ti Pinili, napan ti biktima ken 10 a kabarangayan na iti dam gapu ta adda ti agkasangay.
Nupay kasta, kabayatan ti kaadda da iti dam ket napan nagliwliw ti biktima ngem ditoy a natennag iti danom.
Kuna na a basar ti maysa kadagiti kakadwa ti biktima a nakakita kenkuana, kalpasan a natennag ni Rinen iti danom a 10 a kadapan ti kaadalem na ket nakita na nga agtagtagerger agingga a limned.
Kalpasan ti 30 a minutos ket naiyaon ni Junelyn Cargado, agtawen ti 41, ken residente iti Barangay Nagtrigoan ti biktima ken isu metten ti isasangpet dagiti kameng ti Bureau of Fire Protection (BFP), Municipal Health Office (MHO), Philippine National Police (PNP), ken dagiti opisyal ti barangay.
Intaray da ti biktima iti Karmeli Hospital iti Barangay Apatut-Lubong iti nasao nga ili ngem naideklara a dead on arrival.
Naamoan iti ikit ti biktima a ni Honey Marzan a no mabannog ti kaanakan na ket agkombulsyon ken ag-seizure.
Inpakaammo ni Taccad a ti ina ti ubing ket adda idiay Cagayan idinto a ti aman ket adda iti abroad isut gapuna a ti ikit na ti pagyayanan na.
Agtultuloy ti imbestigasyon dagiti otoridad tapno maamoan no siasinno dagiti kadwa ti biktima ken no apay nga awan ti napan nangarayat kenkuana a dagus kalpasan a natennag iti danom.
