LAOAG CITY – Natiliw ti maysa a menor de edad a lalaki a taga Bacarra kalpasan a ginandat na ti agtakaw ti irik iti Barangay Dibua-North ditoy ciudad ti Laoag.
Inbatad ni Barangay Chairman Henry Ancheta iti nadakamat a barangay a basar iti imbestigasyon da ket inlibas ti menor de edad ti kuliglig ti uliteg na nga isu ti nagikargaan na kadagiti irik.
Kuna na nga idi tiliwen dagiti kabarangayan na ti menor de edad ket nakaikargan ti siyam a sako ti irik iti kuliglig ken isaruno na koma a bunagen ti innem pay a sako.
Inlawlawag ni Ancheta nga idi nakita dagiti kabarangayan na nga agbunbunag ti irik ti suspek ket napanda sinaludsud iti agtagikua no pabunbunag na dagitoy.
Apaman a naamoan dagiti kabarangayan da iti agtagikua a saanna a pabunbunag dagiti irikna ket kinemmeg da a dagusen ti menor de edad.
Inpakaammo ni Ancheta a ti palawag kadakuada ti menor de edad ket kayat na ti gumatang ti mountain bike.
Gapu iti napasamak ket insigida a nagreport ni Ancheta iti Philippine National Police ken pinakaammoan da ti nagannak ti menor de edad.
Innayon na a nakaammon ti Philippine National Police a nangi-turnover iti City Social Welfare and Development
ti nasao a menor de edad a maysa nga out of school youth.
Kabayatanna, kuna ni Ancheta a mapatta-patta nga agbalor koma amin ti agarop 50 ribo a pisos dagiti irik no nailako ti nasao a menor de edad.
Naamoan a ti menor de edad ket trabaho na ti agbunag ti irik ken matandanan isut gapuna nga idi damo ket inpagarop dagiti nakakita a residente a pabunbunag daytoy ti agtagikua.
