LAOAG CITY – Natiliw ti maysa a menor de edad iti naiyuswat a drug buybust operation iti maysa nga apartment iti Brgy. 16 ditoy siudad ti Laoag.
Segun ken ni PLt. Col. Rafael Lero, ti hepe ti PNP-Laoag, maysa a pulis ti nagpammarang a posuer buyer iti suspek.
Kuna na a naaramat iti transaksyon ti maysa a plastic sachet ti marijuana ken 500 a pisos a marked money.
Malaksid iti daytoy, inbatad ni Lero a nakumpiskar pay manipod iti suspek ti maysa a sachet ti marijuana.
Inpakaammo na nga agdagsen amin ti nakumpiskar a marijuana iti 11.8 a gramo ken mapatta-patta nga agbalor ti P1,700.
Immunan nga inpakaammo ni Lero a ti menor de edad ket datin a natiliw idi Hunyo 2018 ken naipasidong iti Bahay Pag-Asa ditoy siudad gapu met laeng iti iligal nga aktibidad.
Nu pay kasta, kuna na a babaen kadagiti naaw-awat a report ti PNP-Laoag ket namonitor a nagsubli daytoy iti iligal nga aktibidad ken miembro pay iti maysa a fraternity group.
Gapu iti daytoy, inpakaammo ni Lero a maiyuswat ti imbestigasyon kadagiti dadduma a miembro ti pakaibilangan a fraternity ti suspek tapno madeterminar nu karaman dagitoy iti operasyon ti iligal nga aktibidad.