LAOAG CITY – Balligi a natiliw ti subject ti entrapment operation a naiyuswat iti Brgy. Bagbag iti ili ti Solsona.
Nabigbig ti suspek a ni Romeo Wenceslao Jr. agtawen ti 39 ken residente iti Brgy. Escoda iti ili ti Marcos.
Kuna ni PLt. Jacson Sugayen, mangidadaulo ti PDEU-Ilocos Norte, ti suspek ket miembroiti maysa a drug group nga agop-operar ditoy probinsya.
Inbatad na a nakumpiskar manipod iti ikot ti suspek ti maysa nga sling bag a naglaon ti walo a sachet ti maatap a shabu, maysa a calibre 38 a paltog nga addaan ti tallo a bala, wallet a naglaon ti dua a ribo a pisos ken dadduma pay a personal a kagamitan daytoy.
Immuna iti daytoy, inpakaammo ni Sugayen a gapgapo ti suspek iti Metro Manila idi naiyuswat ti operasyon ken maipagarup nga isu ti nakaalaan na ti suplay ti ikot na nga iligal a druga.
Innayun na a namunganay ti pannakasipot ti suspek kalpasan nga adda ti report a naawat dagiti operatiba mainaig iti maipagarup a panaglaklako na ti paltog.
Kuna ni Sugayen a manamnama a sumango iti kaso a paglabsing ti RA9165 wenno ti Comprehensive Dangerous Drugs Act of 2002 ti suspek ken RA10591 gapu iti iligal a panagikot daytoy ti paltog.
Kabayatanna, naiget a naglikudan ti suspek dagiti alegasyon kontra kenkuana.
