LAOAG CITY – Nangipila ti kaso ti maysa a misis idiay Ankara, Turkey kontra iti misterna gapu ta sadot nga agdigos ken ag-toothbrush.
Basar kadagiti report, nangipila ti divorce ti maysa a babai a nagpaidulin iti naganna nga A.Y. gapu iti panagbalin a narugit iti bagi ti misterna.
Basar iti abugado ti misis, malaksid iti kinasadot nga agdigos ti mister daytoy ket saan pay nga agsuksukat ti bado ken agtut-toothbrush.
Kas pammaneknek iti kinakurangna iti hygiene, nagipatulod ti saksi ti misis ken sumagmamano ditoy ket dagiti karrubana ken dagiti katrabahoan ti misterna.
Nailanad iti court documents, maysa a daras iti maysa a lawas laeng nga agdigdigos ti misterna.
Iti sinapataan a sarita dagiti katrabahoan ti mister, saanda a kabaelan ti body odor ken sang-aw ti mister isu nga immannugotda nga agbalin a witness.
Inaprobaran ti korte ti divorce ken pagbayadenda ti misterna ti 500,000 Turkish lira a katukad ti P922,000 kas panagbayad iti misisna a nabayag a naganos iti narugit ken nabangsit a misterna.
