LAOAG CITY – Natay ti maysa a motorista kalpasan a naawanan ti kontrol ti inmaneho na a motorsiklo iti Brgy. 27 Mumulaan, iti ili ti Paoay.
Nabigbig ti biktima a ni Joshua Sotelo, agtawen ti 34, awanan asawa, maysa a beautician ken residente iti Brgy. Nagbacalan, iti nadakamat nga ili.
Basar iti inisyal nga imbestigasyon, agpa-amianan a direksyon ti biktima iti Paoay-Balacad road a sakupen ti Barangay Mumulaan idi kellaat a naawanan isuna ti kontrol a nangitunda ti pannaka-slide na.
Nagsagaba daytoy ti nagduduma a sugat nangruna iti ulo na ken natukkol ti akin-kannawan nga ima ken saka na.
Insigida met a naitaray ti biktima iti Mariano Marcos Memorial Hospital and Medical Center para iti naan-anay a panankataming ngem naideklara a dead on arrival.
Kabayatanna, naamuan a ti biktima ket awan suot na nga helmet ken reflectorized vest apaman ti insidente.
