LAOAG CITY – Nagdinnungpar ti maysa a motorsiklo ken SUV iti Brgy. 11, San Fernando iti ili ti San Nicolas.
Basar iti Philippine National Police iti nasao nga ili, nabigbig ti driver ti motorsiklo a Mio 125 nga agmaris ti puraw a ni John Emil Bagain, adda iti umno a tawen, awanan asawa ken residente iti ili ti Bangui ken ti kalubbonna a ni Khazel Ann Lazaro y Sanchez, adda iti umno a tawen, awanan asawa ken residente ti Brgy. 11, San Fernando iti ili ti San Nicolas.
Nadakamat iti imbestigasion, nabigbig ti nangiturong met ti SUV nga Hi Ace GL Grandia nga agmaris ti puraw a ni Asis Michelle Ignacio y Pangilinan, agtawen ti 45, naasawaan, ambulance driver ken residente ti Brgy. 3, Loing iti ili ti Piddig.
Basar iti insayangkat nga imbestigasion dagiti otoridad, kabayatan a dumaldalyasat ti motorsiklo iti national highway nga agpa-daya ket kellaat a nadungpar daytoy ti SUV nga agpa-amianan.
Gapu iti daytoy, dagus a naitaray ti driver ti motorsiklo iti Mariano Marcos Memorial Hospital and Medical Center iti siudad ti Batac ken ti kalubbonna ket naikabil iti Black Nazarene Hospital iti ili ti San Nicolas idinto a ti driver ti SUV ket naitaray iti Governor Roque Ablan Senior Memorial Hospital ditoy siudad ti Laoag.
Kabayatanna, iti agdama ket agtultuloy ti maisaysayangkat nga imbestigasion maipapan iti nasao a desgrasia.
