LAOAG CITY – Nasugatan ti ulo ti driver ti motorsiklo kalpasan ti pannakadesgrasya na iti Barangay Calambig iti ili ti Piddig.
Nabigbig ti biktima a ni Sherwin Gregorio y Domingo, agtawen ti 36 ken residente iti nasao barangay.
Iti imbestigasyon dagiti kameng ti PNP-Piddig, agpapa-abagatan a direksyon ni Gregorio idi liniklikan na dagiti batbato a nakawarang iti kalsada.
Gapo iti daytoy, napukawan ti kontrol iti manibela ni Gregorio rason ti pannakdesgrasya a nagsagabaan na ti sugat iti ulo, gasgas iti akin-kannawan a saka na ken iti nagduduma pay a paset ti bagi na.
Dagus met a naitaray ni Gregorio iti Piddig District Hospital ngem naiyakar iti Mariano Marcos Memorial Hospital and Medical Center idiay ciudad ti Batac.
Naamoan nga adda iti impluwensya ti nasanger ni Gregorio ken awanan ti helmet bayat ti panagiturong na ti motorsiklo.
