LAOAG CITY – Pimmusay ti maysa nga indibidual kalpasan ti panagdinungpar ti motorsiklo ken kurong-kurong iti Barangay 23, San Matias ditoy ciudad ti Laoag.
Nabigbig ti natay a ni Julius Espejo, agtawen ti 18 ken residente iti Barangay Bubon iti ili ti Burgos, idinto a dagiti dua akinalubbon na ket isuda Eric Calacal, agtawen ti 19, residente iti Barangay 7-A ditoy ciudad ti Laoag ken ni John Oliver Caingit, agtawen ti 23 a residente iti Barangay Gabut-Norte iti ili ti Badoc.
Karaman pay iti desgrasya ti kurong-kurong nga inturong ni John Luiz Adriano, agtawen ti 20 ken dagiti pasaheros na nga isuda Regie Apdian, Maynard Ramos, agpapada a residente iti Barangay Lagui-Sail ditoy ciudad ti Laoag.
Iti imbestigasyon ti Philippine National Police – Traffic Division ditoy ciudad, agpadaya ti kurong-kurong a sarsarunwen met ti motorsiklo.
Nupay kasta, idi nakadanon dagitoy iti nakapasamakan ti insidente ket immovertake ti motorsiklo ngem nadungpar na ti nasao a kurong-kurong.
Gapo iti daytoy, naidungpar ti motorsiklo iti alad ti pagtaengan ni Lolita Ancheta.
Kas resulta, nagsagaba ti driver ti motorsiklo ken dagiti dua a kinalubbon na kasta met ti maysa a pasahero ti kurong-kurong ti sugat iti nagduduma a paset ti bagi da.
Naitaray iti ospital dagiti biktima ngem naideklara a dead on arrival ti driver ti motorsiklo.
Kabayatanna, nagpositibo met iti nasanger ti driver ti kurong-kurong.
