LAOAG CITY – Nagballigi dagiti kameng ti Philippine National Police a nangarestar iti maysa a musikero iti naisayangkat nga anti-illegal drug buy-bust operation ditoy ciudad ti Laoag.
Nabigbig ti suspek iti nagan na a Dencio, agtawen ti 40, awanan ti asawa, taga Tanauan, Batangas ngem agdama nga agnanaed iti Barangay 6 ditoy ciudad ti Laoag.
Dagus a kinemmeg dagiti otoridad ti suspek kalpasan a naglako maysa a sachet a naglaon ti maipagarop a shabu iti nagpammarang a police poseur buyer.
Iti panangkapkap dagiti otoridad iti suspek ket adda pay ti nakumpiskar da iti ikot na a 7 a sachet a naglaon metlaeng iti maipagarop a shabu.
Mapatta-patta nga umabot iti 42,160 a pisos ti balor dagiti nakumpiskar a maipagarop a shabu manipod iti nasao a suspek.
Naamoan a ti suspek ket maibilang kas Street Level Individual iti Drug Watchlist ti Philippine National Police ditoy ciudad ti Laoag.
Nagtalinaed ti suspek iti Philippine National Police ditoy ciudad ti Laoag kabayatan a maisagsaganan ti kaso a maipila kontra kenkuana.
