LAOAG CITY – Maysa a nasalun-at a maladaga ti naipasngay iti uneg ti bus.
Segun ken ni Mr. Rolly Queja, driver ti bus a Maria De Leon, agarup 7:40 ti rabii ket adda ti na-pick up da a maysa a pasahero a babai iti paset ili ti Aringay, La Union nga agturong koma iti San Fernando City, La Union.
Inbatadna a nakadawyanda a no adda ti makita wenno malabsanda iti kalsada ket masansan nga agsardeng ti luganda tapno saludsuden dagitoy no aglugan wenno saan.
Inlawlawagna a saanna met nga inpagarup a masikog ti maseknan a babai nangruna ket medyo nalukmeg daytoy isu a binaybay-anna nga iti likod ti bus ti nagtugawan daytoy.
Kunana a saan a nagbayag ket adda dagiti sumagmamano a pasaheroda ti nangibaga kenkuana nga adad ti maysa a pasahero ti agpasngay.
Gapu iti daytoy, kinunana a dagus a nagpataray ken saanen a nag-pick up iti asinoman a pasahero iti laksid nga adda dagiti agsadsada iti bus-da.
Inpalgakna nga idi nakadanonda iti ospital ti San Fernando City ket nagtitinnulong dagiti staff and personnel iti nasao nga ospital para iti pannakaasikaso ti maseknan a nagpasngay a pasahero.
Mainaig iti daytoy, inpakaammo ni Queja nga adda ti maysa a nursing student nga adda iti bus a nairana a nailuganna nga isu ti maysa kadagiti kangrunaan a nangtulong kabayatan a nagpasngay ti maseknan a babai.
Naammoan nga inyangaw nga inkiddaw ti driver ti bus a “Mario” ti ipanagan ti kaipasngay a maladaga a lalaki.
Kabayatanna, naitulod met laeng a nasayaat dagiti dadduma a pasahero iti pagturunganda iti baet a naitantan ti biahe dagitoy.
