LAOAG CITY – Nagbalaag ti nabiktima ti budol-budol ti maysa a negosyante a ni Mrs. Maria Veronica Arellano a taga Brgy. Caunayan idiay ciudad ti Batac kadagiti pada na a negosyante a liklikanda dagiti agidiay-diaya iti processed products wenno frozen goods nga addaan ti free freezer ken food cart.
Segun kenni Arellano, adda ti dua a lalaki a nagpabigbig iti nagan a Macky ken Jeff kenkuana ken tallo a babbai a saanen nagpabigbig a nanggutigut a gumatang ti processed products kas iti hotdogs, longganisa, tocino, bologna ken dadduma pay.
Inbatad na atapno maala na ti nasao a freezer ken food cart ket masapol nga ag-down ti 4,500 ken sabali laeng ti inbayad na iti ginatang na produkto.
Innayon pay ni Arellano nga inbatad dagiti suspek kenkuana nga amin dagiti small entrepreneurs manipod iti ili ti Paoay ken ciudad ti Batac ket isuna iti pagalaan da ti supplay no gumatang iti nasao a produkto.
Kalpasan iti dayta, nagsubli dagiti budol-budol gang iti pagtagilakoan na ket dita a bitbit dan iti nasao a produkto ken styro-foam.
Nagpapirma pay dagiti suspek iti delivery product nga inpagarop ni Arellano a resibo a pakairamanan ti assurance services.
Inlawlawag ni Arellano a saan na maala ti freezer agingga a saan na ipatulod ti kidkidawen dagiti suspek nga P4,500 ribo a pisos gapu ta saanda agawat iti Cash on delivery ken mainagan iti nagpabigbig a manager a ni Vincent Chan.
Innayon na pay a no maawat dan iti naipatulod a kuarta ket ideliver dan iti freezer ken food cart.
Gapu iti daytoy, ninamnama ni Arellano a dumanon ti nasao a freezer ken food cart iti isu met laeng nga aldaw kalpasan a naipatulod na iti nasao a kuarta ngem awan iti naawat na.
Kabayatana, nagkiddawen ni Arellano ti kopya ti CCTV footage para iti naan-anay ng a imbestigasyon dagiti kameng ti PNP-Batac seknan iti pasamak.
Nagpanawagan pay ni Arellano kadagiti kumpanya ti processed foods nga aksyunan da iti mapaspasamak a panagusar dagiti kontrabando ti nagan ti kumpanya da tapno malapdan iti nasao insidente.
