LAOAG CITY – Natay ti maysa a negosyante bayat a maag-agasan iti ospital kalpasan ti pannakadesgrasya na iti Gilbert Bridge, bisinidad ti Barangay Nangalisan ditoy ciudad ti Laoag.
Nabigbig ti biktima a ni Lysander Tangonan Cariaga, addaan ti umno a tawen ken residente iti Barangay 6, San Pedro iti ili ti Bacarra.
Segun kenni Police Corporal Alexon Rosal, duty investigator iti PNP-Traffic Division ditoy ciudad, agpaabagatan ti biktima a nakamotorsiklo ket naawanan ti kontrol a puon ti pannakaidungpar na iti barikada.
Inbatad na a ti biktima ket adda iti impluwensya ti nasanger, napaspas ti panagpataray na ken rumrumuar nga awan ti suot na nga helmet.
Rumrumuar a ti biktima ket aggapo iti ili ti Bacarra ken agturong kuma iti ili ti San Nicolas.
Naitaray ti biktima iti Gov. Roque Ablan Senior Memorial Hospital ngem pimmusay bayat a maag-agasan.
