LAOAG CITY – Inrakurak ni Vice President Sara Duterte nga addan ti maysa a pagilian a maipagarup nga immannugot nga awaten ti amana a ni dati a Presidente Rodrigo Duterte nga agdama a nakabalud idiay The Hague, Netherlands kabayatan a tingtingitingen ti International Criminal Court (ICC) gapu kadagiti kaso nga addaan ti pakainaiganna iti crimes against humanity mainaig iti nadara a kampaniana kontra iti ilegal a droga.
Iti panagbitlana kadagiti naruay a Pilipino idiay Japan, inbatad ni Vice President Sara nga isuna mismo ti makikikoordinar kadagiti pagilian tapno makabiruk ti mapagtalkan a pagilian nga umawat iti amana gapu ta awan ti namnamaenna ditoy Pilipinas.
Saanen nga innaganan ti Bise Presidente ti nasao a pagilian ngem inpasigurado a saan daytoy a Japan no sadinno nga immunan nga inbatad ti Australia a nagkedked daytoy nga awaten ni Duterte.
Daytoy a rakurak ket kagiddan ti kiddaw ti kampo ni dati a Presidente Duterte para iti interim release a naipila idi Hunio.
Inpetteng ti abugadona, awan ti flight risk ni Duterte ken saan a kasapulan nga agtalinaed a nakabalud kabayatan a matingtingiting.
Nupay kasta, saan nga immannugot ti Office of the Prosecutor ti International Criminal Court ken inpettengna a kasapulan ti agtultuloy a pannakaibalud ni Duterte tapno masigurado ti panagatendarna iti imbestigasion.
Mainaig iti daytoy, dua nga organisasion ditoy Pilipinas a tumultulong kadagiti pamilia dagiti biktima ti war on drugs ti nangipeksa met ti pananglapped iti temporario a pannakawaya-waya ni Duterte gapu iti risgo a maimpluwensiaan daytoy dagiti imbestigasion ken kinatalged dagiti testigo.
Maipalagip a ni dati a Presidente Duterte ket naibalud idiay Netherlands idi Marso 2025 ken sumangsango iti pannakaimbestigar mainaig iti war on drugs a basar iti pulisia ket dumanon iti innem a ribu ngem basar kadagiti human rights group ket posible a dumanon daytoy iti 30 a ribu pakairamanan dagiti vigilante killings.
