LAOAG CITY – Natakawan ti maysa a pagtaengan iti Barangay Barit ditoy siudad ti Laoag.
Segun ken ni Barangay Chairman Benjamin Pudiquet iti nasao a barangay, naitaray ti pito a ribu a pisos dagiti saan pay a nabigbig a suspek a nakalugan ti motorsiklo nga awan ti plate number-na.
Inbatadna nga adda ti nagsardeng a nakamotorsiklo iti sangoanan ti nasao a pagtaengan ken maipagarup a kellaat simrek dagiti suspek.
Inlawlawagna nga awan ti tao iti pagtaengan idi napasamak ti insidente gapu ta napan intulod ti akinkukua ti balay ti apokona a napan iti pagadalan.
Kunana a naripar laengen ti biktima a mapukpukaw ti kuartana idi nagsubli daytoyen iti pagtaenganda manipud iti pagadalan.
Innayonna a saan a naka-lock ti ridaw ti pagtaengan idi serreken dagiti agtatakaw.
Naammoan a daytoy ti umuna a gundaway nga adda ti naipadamag a natakawan iti barangayda sipod nagtugaw isuna kas Kapitan.
Kabayatanna, awan ti Close Circuit Television wenno CCTV camera a nakaimuntar iti asideg mismo iti nakapasamakan ti panagtatakaw.
Iti agdama, bayat a maisursurat daytoy a damag ket saan pay a naipadanon daytoy nga insidente iti Philippine National Police.
