LAOAG CITY – Naminpinsan a naitayab ti bubongan ti maysa a pagtaengan iti Brgy. Nalbo ditoy siudad ti Laoag gapu iti kinapigsa ti angin gubuay iti iduduprak ti Bagyo Marce.
Segun ken ni Mr. Ronnie Corpuz, akinkukua ti nadadael a pagtaengan, nadlawna nga arig in-inot a maliklikyab ti galbada gapu iti napigsa nga angin isu a napan daytoy iti ruar ti balayda tapno kitaen.
Nupay kasta, inpalgakna a saan a nagbayag ket nakangngeg isuna ti napigsa a tagari ket ditoy a nakitana ti sibubukel a bubongda a naikkaten.
Gapu iti daytoy, kunana a nabasa dagiti kagamitan iti uneg ti pagtaenganda.
Inlawlawagna a dagus nga adda met ti napan nagresponde kadakuada ngem nagkedkedda nga agibakwit gapu ta napanda iti balay ti kabsatna nga imbes a ti evacuation center ti pagtarusanda.
Naammoan nga innemda nga agnanaed iti nasao a pagtaengan pakairamanan ti agtawen iti lima a bulan a maladaga.
Innayonna nga adu ti bagyo ti dimmuprak ditoy probinsia ngem naidumduma ti kinapigsa nga inbati ti Bagyo Marce kadakuada.
