LAOAG CITY – Naminpinsan a dimmapo ti maysa a pagtaengan iti Barangay 4 Poblacion iti ili ti Pasuquin gapu iti uram.
Daytoy ti inpakaammo ni Fire Insp. Dominador Ignacio – Municipal Fire Marshal ti Bureau of Fire Protection iti ili ti Pasuquin.
Segun ken no Ignacio, agarop 12:24 ti parbangon ket adda timmawag a concerned citizen nga adda maur-uram a pataengan.
Nagresponde da a dagos dagiti kameng ti Bureau of Fire Protection iti ili ti Pasuquin, ket idi nadanon da ti lugar ti insidente ket nabungonen ti apoy ti pagtaengan ni Mrs. Novelina Garduque.
Kunana a nasurok maysa nga oras sakbay a naideklara a fire out, iti babaen ti tallo nga fire truck iti nadakamat nga ili.
Naamuan a daanen ti balay ken naaramid daytoy iti light materials, ngem agpapan ita ket saan pay a masinunuo no ana ti namunganayan ti uram ngem ti kitkitaen da a rason ket dagiti daan a waya ti nadakamat a pagatengan.
Kuna ni Ignacio nga agarop 300,000 a ribo a pisos ti dagop ti nadadael ti uram pakairamanan ditoyen dagiti alikamen ti anak ni Garduque nga agtrabtrabaho.
Gapu iti dauytoy ket inbatad pay ni Ignacio nga iti agdama ket adda pay laeng iti ospital ni Garduque gapu ta apaman a nagramram ti apoy ket ginandat na a sinebseban daytoy ngem saan na a kinaya rason no apay a nauram ti sumagmamano a paset ti bagi na partikular ti takyag, ti bukot na ken ti rupa na.
Mainaig iti daytoy ket nagpalagip ni Ignacio a kanayon a kitaen dagiti appliances, pakairamanan dagiti daan a waya ken dagiti mabalin a pamunganayan ti apoy tapno makaliklik iti aniaman nga uram .
