LAOAG CITY – Kinumpirmaran ni Brgy. Chairwoman Bang Rarangol iti Brgy. Nagpatpatan iti ili ti Solsona a maysa a pagtaengan ti nauram iti nasao a barangay.
Inbatad ni Rarangol nga agarup alas dose y media itay malem a naireport kenkuana ti nasao nga uram.
Gapu iti daytoy, dagus a timmawag iti Burea of Fire Protection (BFP).
Mainaig iti daytoy, kuna ni Rarangol a basar iti palawag ti agtagikua, nagluto da iti dalikan ken kalpasan na ket napanda iti taltalon rason nga awan ti nabati iti nasao a pagtaengan.
Patienna a posible nga adda ti nabati a beggang iti dalikan nga isu ti namungayan ti uram.
Inbatadna na a dimmapo amin a gamit ti pamilya a naapektaran ti nasao nga uram malaksid kadagiti irik nga insalbar dagiti karruba da.
Immuna iti daytoy, inpakaamo ni Rarangol nga iti kusina a naaramid babaen ti kawayan ti narugyan ti uram rason nga alisto a nagramram daytoy agingga iti sementado a paset ti pagtaengan.
Kabayatanna, kuna ti barangay chairwoman nga agtultuloy ti imbestigasyon ti BFP.
Innayun na a temporaryo met pay laeng nga agnaed ti pamilya a nauraman kadagiti kabagyanda.
