LAOAG CITY – Nauram ti maysa a pagtaengan iti Sitio Camangaan iti Brgy. Napu iti ili ti Badoc.
Daytoy ti kinumpiramaran ni SFO4 Benjo Abrogena, Fire Marshall ti Bureau of Fire Protection iti ili ti Badoc.
Segun kenkuana, nakaawatda ti tawag iti maysa residente iti agarup alas-onse trentay tres ti rabii idi Disiembre 18 a maururam ti maysa a pagtaengan iti nadakamat a lugar rason nga insigida ti napan nagresponde tapnu masebseban ti apoy.
Basar iti imbestigasion, naaramid iti light materials dagiti sumagmamano a paset ti pagtaengan ken mapattapatta nga umabot iti P700,000 ti balor dagiti nadadael pakaiarmanan ti maysa a lugan, maysa a puv ken dua a tricycle.
Kinunana na nga awan ti nadangran nga indibidual iti napasamak nga uram gapu ta awan ti agnanaed iti nadakamat a pagtaengan.
Gapu iti daytoy, agtultuloy ti naan-anay nga imbestigasion no ana ti namunganayan ti napasamak nga uram.
Kabayatanna, nagpalagip ni Abrogena a naiget a monitoren dagiti Christmas lights nga ususaren ken siguraduen a saan nga iso ti pagrugian ti uram tapno maliklikan ti aniaman nga insidente.
