LAOAG CITY – Inlawlawag ni Brgy. Chairman Arnold Alibuyog iti Brgy. Tabug iti siudad ti Batac ti napasamak nga uram iti maysa a pagtaengan iti nasao a barangay.
Inbatad na nga agbuybuya ti anak ti agtagikua iti balay a ni Mr. Nestor Magarro idi ta kellaat a nakanggeg ti putok.
Gapu iti daytoy, dagus a napan na kinita ti kwarto a posible a naggapwan ti putok ket dita a naduktalan na nga addan ti agas-asok ken maur-uram dagiti ramit iti uneg ti kwarto.
Inbatad na a ginandat ti anak ni Magarro a sebseban ti uram pakairamanan dagiti karruba da nga immarayat.
Nu pay kasta, saanda a kinabaelan a masebseban rason a nagparesponde da iti BFP.
Naamoan a dua a kwarto ti nauram pakairamanan dagiti dadduma nga alikamen dagiti maseknan kas iti TV, frijidier ken tugaw.
Mainaig iti daytoy, kuna ni Brgy. Chairman Alibuyog nga awan met ti nadangran iti nasao nga uram.
Kabayatanna, agtultuloy ti imbestigasyon dagiti kameng ti BFP iti nasao nga insidente.
