LAOAG CITY – Kalikagum ni Mrs. Lorna Domingo, akinkukua ti pagtaengan iti Brgy. Balatong ditoy Siudad ti Laoag nga aksiyunan koma ni Brgy. Chairman Joseph Bitagon iti napasamak a panagubur-ubur ti pagtaenganda.
Daytoy ket kalpasan a maipagarup a saan a nagtignay ti aniaman nga addang ti Kapitan iti nasao a napasamak.
Segun ken ni Domingo, namunganay ti panagubur-ubur ti dua a lallaki a nabigbig a da Ronald Ballesteros ken Elizer Bosca iti pagtaenganda kalpasan a binugkawan ken binakal ti bote ti anakna dagiti dua a maseknan gapu ta agpabpaberber dagitoy iti batog mismo iti tawa ti pagtaenganda.
Inlawlawagna basar iti takder dagiti dua a lallaki kadakuada a naaramidda ti panagubur ti bato iti pagtaenganda gapu ta maipagarup saan a kayat a papagnaen ti anakna dagitoy iti kalsada.
Inbatadna a dagusda a nagkiddaw iti Barangay ti naan-anay a tulong pakaseknan iti napasamak iti pagtaenganda ngem arig ket saan nga inikkan ti importansia ti Kapitan.
Gapu iti daytoy, nagkamangda iti Philippine National Police ditoy Siudad ti Laoag ket dagus met dagitoy a napan nagresponde ket ditoy a nagsasarita dagiti agsinnungbangir a partido ngem inpaimada met laeng iti Barangay.
Nupay kasta, inpalgakna nga idi mapan ag-report ti anakna ket maipagarup a saan a trinatar ti Kapitan ngem idi ti asawa ti maysa kadagiti nagubur ti nag-report iti Kapitan ket insigidana met daytoy a trinatar.
Mainaig iti daytoy, kunana a daytoyen ti maikadua a daras nga inaramid dagiti maseknan iti panagubur iti pagtaenganda banag a masdaaw daytoy nangruna ket saanna a masinunuo no adda ti dati a susik wenno riri dagiti dua a lallaki ken ti anakna.
Kabayatanna, bayat a maisursurat ti damag ket ikarkarigatan ti Bombo radyo Laoag News Team nga alaen ti reaksion ti maseknan a Kapitan iti nasao a pasamak.
