LAOAG CITY – Maysa a pamilya iti Henan Province idiay China ti mas pinilida nga agnaed iti maysa nga hotel gapu ta mas makatipid dagitoy no idasig no agabangda.
Napagsasaritaan iti kallabes idiay China ti post iti online ti agnagan ti Mu Xue kalpasan nga inpakitana kadagiti followers-na ti ladawan ti pamilyana nga inaramidda a permanente a pagtaengan ti luxury suite ti maysa a nangina nga hotel iti Nanyang.
Gapu iti daytoy, naala ti atension dagiti netizens gapu ta mabasa iti caption ni Xue na 229 nga aldaw wenno nasurok pito a bulanen nga agnanaedda iti hotel ken awan ti planoda a tumalaw.
Ti luxury suite a padpadaanan ti pamilia ni Xue ken addaan ti dua a bedroom ken dakkel a living room nga aggatad ti 1,000 yuan wenno katukad ti P7,800 per day.
Adda ti walo a miyembro ti pamilyada ken segun ken ni Xue, dakkel ti matipidda iti magastos gapu ta karamanen a mabaybayadan ti danum, kuryente, internet, cable, housekeeping ken parking space. Malaksid a makatipidda, mas komportable dagitoy iti setup.
Naruay a Chinese netizens ti nasdaaw iti lifestyle ti pamilya ni Xue ken nangibaga a no adu ti kuartada ket agnaed latta dagitoy iti hotel idinto a dagiti sumagmamano ket nagatap iti post a saan daytoy a pudno.
Kabayatanna, tapno mapaneknekan ti post-na, inpakita ni Xue ti bill ti hotel ken bank deposit daytoy nga agbalor ti rinibu a yuan.
