LAOAG CITY – Kinumpirmaran ni Barangay Chairman Angelito Acierto iti Barangay Columbia iti ili ti Vintar nga inikkat dan ti barikada iti Sitio Maapgad.
Daytoy ket kalpasan a rimwaren manipud iti isolation facility iti ili ti Vintar ti maysa a pamilya a nag-quarantine.
Segun kenni Acierto, nagawiden dagiti miembro ti pamilya kalpasan a nagnegatibo ti resulta ti swab test dagitoy.
Nagyaman met ti kapitan kadagiti kabarangayan da kadagiti amin a timmulong iti panag-checkpoint ken ti pannakaawat dagiti residente kabayatan ti pannaka-lockdown ti Sitio.
Maipalagip a temporaryo a naipatungpal ti lockdown iti nadakamat a Sitio gapo ta ti maysa kadagiti nagpositibo ti covid-19 ditoy probinsya ket nagturong iti nasao a lugar sakbay a rimwar ti resulta ti swab test na.
