LAOAG CITY – Naalarma ti pamilya Abragar iti Barangay Zamboanga ditoy ciudad ti Laoag kalpasan a nakaparnuay ti uram ti mismo a gas stove da.
Segun kenni Mrs. Lydia Abragar, idi agluto kuma ti kaanakan na ket kellaat lattan a nagapoy ti gas stove ken gapo ta naangin ket dimmakkel ti apoy.
Inbatad na a gapo iti daytoy ket nangala da ti darat ken danom tapno pangsebseb iti apoy ken inguyod da nga inruwar tapno maliklikan ti pannakairaman a mauram ti uneg ti balay da.
Kunana a gapo iti nerbyos da ket saan da a mairikep ti tangke da isut gapo na a pinaayaban da a dagus dagiti empleado ti kompanya a nanggatangan da iti tangke da.
Nupay kasta, kunana nga awan met ti nairaman a sanikua da iti nasao a pasamak.
Naamoan a sinukatan met dagiti maseknan ti host ken regulator ti nasao a gas stove.
