LAOAG CITY – Maysa a pasahero ti SpiceJet airline ti buo a biahe a naipupok iti comfort room kalpasan a nag-malfunction ti lock ti ridaw daytoy.
Napasamak ti insidente iti flight SG-268 ti SpiceJet airlines a biahe a Mumbai nga agturong iti Bengaluru. Apaman a nag-take off ti eroplano, insigida a nagusar ti Comfort Room ti saan a nainaganan a lalaki a pasahero a nakatugaw iti seat 14D.
Nupay kasta, saanen a nakaruar ti pasahero idi nag-malfunction ti lock ti ridaw daytoy. Sumagmamano kadagiti crew ken padana a pasahero ti eroplano ti nanggandat a tumulong ngem saanda a naluktan daytoy.
Naammoan a tapno saan a mabuteng ti nakapupok a pasahero, nangipaay ti surat ti maysa kadagiti cabin crew ken inkabilna daytoy iti sirok ti ridaw. Iti surat, binagaan ti cabin crew ti nakapupok a pasahero a saan nga ag-panic ken iti panagdissona iti airport ket insigida a timmawag ti engineer tapno maluktan ti ridaw.
Iti panag-landing ti eroplano iti Kempegowda International Airport iti Bengaluru, pinaluktan ti engineer ti ridaw tapno i-rescue ti pasahero.
Nangiruar ti statement ti SpiceJet maipapan iti insidente ken nagkiddawda ti panagpadispensar iti pasahero. Inkarida met ti pannaka-refund ti buo a plete ti pasahero.
