LAOAG CITY – Patta-pattaen ni Mrs. Vanessa Galapon iti Barangay 25 ditoy ciudad ti Laoag nga umabot iti nasurok 30 a ribo a pisos ti balor dagiti natakaw iti pasdek negosyon na.
Segun kenni Galapon, idi napan iti pasdek ti agbabantay na iti pwesto na ket nakigtot gapo ta nakaiwara iti datar dagiti lako da ken nadadael ti kandado ti ridaw iti laksid a saan a nalukatan.
Karaman kadagiti intaray dagiti suspek ket ti lima a bag, ken dadduma pay nga pa-order da.
Inlawlawag na nga idi napan iti mismo a pwesto da ket naduktalan a nadadael ti tawa nga isu ti patien da a nagnaan dagiti suspek.
Kunana nga awan ti nakaimuntar a CCTV iti pwetso da ken napan ti asawa na iti barangay ngem naamoan a perdi ti CCTV ti barangay da.
Inbatad na pay a saan a daytoy ti ummuna a gundaway nga adda ti natakawan iti nadakamat a baragay gapo ta iti napalabas a bulan ket naserrek met ti maysa a pagtagilakoan iti abay da. Kabayatanna, agtultuloy ti imbestigasyon dagiti otoridad iti nasao nga insidente.
