LAOAG CITY – Ginandat a nagpakamatay ti maysa a pasiente iti Mariano Marcos Memorial Hospital and Medical Center iti siudad ti Batac.
Segun ken ni PLtCol. Adrian Gayuchan, Hepe ti Philippine National Police iti nasao a siudad, nabigbig ti pasiente a maysa a lalaki, naasawaan, adda iti umno a tawen, construction worker ken residente iti ili ti Allacapan, Cagayan.
Inbatadna a basar iti insayangkatda nga imbestigasion, nagpakada ti pasiente a mapan iti Comfort Room ket dita a binaon ti guardia ti agbanbantay iti pasiente a kuyugenna daytoy ngem kinagurana rason nga insawangna ti balikas a “NAKAIS-ISTRIKTO KAYO KANYAMI, NAMAYMAYAT LAENGEN NGA AGLIBASAKON.”
Gapu iti daytoy, kunana nga immuli ti pasiente iti tawa iti maikadua a kadsaaran iti ospital agingga a nakasapol daytoy ti waya nga isu ti inusarna a pinanggalot iti tengngedna.
Inlawlawagna a pinadas ti agbanbantay a lappedan ti pasiente ngem saanna nga inkaskaso daytoy.
Nupay kasta, inpalgak ni PLtCol. Gayuchan a babaen kadagiti guardia ti balay-pagagasan ken dadduma pay a personnel ket naisalakan met laeng ti maseknan a pasiente.
Immuna iti daytoy, kunana a naitaray ti pasiente iti ospital kalpasan a ginandatna a nagpakamatay babaen ti panaginomna ti pestisidio.
Kabayatanna, iti agdama addan ti natalged a kasasaad ti biktima.
