LAOAG CITY – Kinumpiraman ni Barangay Kapitan Teddy Rosqueta iti Barangay Cali iti ili ti Dingras nga adu dagiti agrekreklamo seknan iti nabangsit nga angot manipud iti piggery da Mr. Elpidio Yapo ken Mrs. Irene Yapo.
Basar kadagiti reklamo, maipagrup nga adu dagiti ubbing a makalang-ab iti saan a makaay-ayo nga angot rason no apay a kalikagomda nga idanon daytoy iti biang ti Department of Agriculture.
Segun ken ni Kap. Rosqueta, naipasdek ti piggery nga addaan ti 200 a metro a kaadayo na iti pagtaengan da Mr. Yapo a patien na a saan da a na-meet ti limitasyon a 500 a metro manipud kadagiti babbalay.
Kunana nga adda met ti septic tank a naaramid nga isu ti pagayusan ti rugit dagiti baboy ngem no apay a adda latta nabangsit nga angot.
Gapu iti daytoy, indanonda ti problema iti biang ti Department of Agriculture (DA), Department of Helath (DOH), iti Department of Evironment and Natural Resources (DENR) ken iti lokal a gobierno tapno mangisayangkatda ti inspeksyon.
Mainaig iti daytoy inpetteng met ni Mrs. Irene Yapo, ti akinkukua ti piggery a gagangay laeng nga adda ti saan a makaay-ayo nga angot iti maysa a piggery.
Ngem patien na a kadagitoy met laeng a rimsua ti problema, gapu iti napigsa nga angin nga agturong iti abagatan a paset nga isu ti ayan dagiti babbalay.
Kunana pay a ti ususaren da a feeds ket adda odor eraser na isu nga kontrolado laeng ti nabangsit nga angot
Innayonna nga idi ipasdek da ti pigerry ket awan pay dagiti pagtaengan idiay ken inaprobaran met daytoy ti Environmental Compliance Certificate (ECC) idi 2004.
Kabayatanna, nagballaag ni Barangay Kapitan Rosqueta kadagiti kabaranggayan na a suroten dagiti pagalagadan no agipasdek ti negosyo a kas iti piggery.
