LAOAG CITY – Inbatad ni Bombo International News Correspondent Diosa Verzosa idiay Hong Kong nga adda ti Pilipino a nagkiddaw ti tulong kalpasan a a natrap da iti pasdek ken kadua na ti amo na ken ti ubing gapo iti uram.
Segun kenni Verzosa, nakaisend pay laeng ti maseknan ti audio message iti pagayam na nga agkidkiddaw ti tulong gapo iti daytoy ken ita ket adda da iti ospital.
Mainaig iti daytoy, kuna ni Verzosa nga adda ti tallo a lallaki ti tiniliw dagiti otoridad gapo iti panagsigarilyo da a mapagat-atapan a nangrugyan iti uram.
Kabayatanna, kunana nga umaboten iti 44 a tattao ti natay, adda pay dagiti nasugatan nga adda iti kritikal ti kondisyon na ken umabot iti nasurok 250 ti mapukpukaw.
Naamoan a pito agingga iti walo a pasdek ti agkakaabay no sadinno maren-renovate ken 4600 nga indibidual ti agnanaed.
Naamoan a manariman ti pannaka-renovate na ket adda latta dagiti pamilya a pinili da ti nagtalinaed iti pasdek.
Agpapan maisursurat ti damag ket adda pay laeng ti apoy iti nasao a pasdek a sebsebseban dagiti bombero.
