LAOAG CITY – Balligi a naarestar ti Top 10 iti Regional Watchlist babaen iti naiyuswat a drug buy bust operation iti paset ti Bonifacio St. iti Brgy. 1 San Lorenzo ditoy siudad ti Laoag.
Daytoy ket babaen iti nagtipon a pwersa ti Philippine Drug Enforcement Unit (PDEU) ken PNP ditoy siudad.
Nabigbig ti suspek a ni Mars Navarro y Navarete, agtawen ti 49, pintor ken residente iti Brgy. 7-B ditoy siudad.
Nausar iti transaksyon ti maysa a sachet ti maatap a shabu ken nailako iti balor a 1,000 a pisos iti nagpammarang a pulis poseur buyer.
Malaksid iti daytoy, nakumpiskar pay dagiti otoridad ken ni Navarro ti karton ti sigarilyo a naglaon met laeng iti maysa a sachet ti maatap a shabu.
Naamoan a ti suspek ket immunan a naarestar idi tawen 2015 ngem nawaya-wayaan idi 2018 babaen iti plea bargaining.
Kabayatanna, inpetteng ni Navarro a nabayagen nga insardeng na ti panaglako ti iligal a droga.
Kuna na bayat nga adda ti kasarsarita na nga agpapinta iti asideg ti YMCA iti Brgy.7-B ditoy siudad ket adda ti nangayab a tricycle driver ken inbaga daytoy nga adda ti agkalikagum nga agpapinta iti balay.
Inbatad na a gapu iti daytoy ket simmurot iti tricycle ken inbaba na iti asideg ti Governor Roque Ablan Senior Memorial Hospital (GRASMH) nu sadino a dita nga immakar a naglugan iti kotse ken dita a naabungan ti rupa na agingga a nakadanon da iti Brgy. 1 nu sadino a naiyuswat ti operasyon.
