LAOAG CITY – Napilaanen ti kaso a panaglabsing ti Republic Act 9165 kontra iti naarestar a subject ti anti-illegal drug buy-bust operation iti Barangay 17, San Francisco ditoy ciudad ti Laoag.
Nabigbig ti suspek a ni Oliver Abad alyas Timpoy, agtawen ti 48, awanan ti asawa, maysa a pintor, ken residente metlaeng iti nadakamat a barangay.
Segun ken ni Police Capt. Rudy James Jacalne, ti Deputy Chief of Police ditoy ciudad ti Laoag, kinemmeg a dagus dagiti otoridad ti suspek kalpasan a naglako ti dua a sachet a naglaon ti maatap a shabu.
Kuna na nga iti panangkapkap da iti suspek ket nakumpiskar da pay iti ikotna ti tallo a sachet a naglaon metlaeng ti maipagarop a shabu ken ti P1,000 a pisos a nausar iti operasyon.
Inbatad ni Jacalne a ti nakumpiskar a maipagarop a shabu ket umabot iti 5.3 a gramo nga agbalor ti 36,700 a pisos.
Innayon ni Jacalne a ti suspek ket newly Identified Drug Personality ditoy ciudad ti Laoag.
Kabayatanna, kinumpirmaran ni Jacalne nga iti pannakaeksamen dagiti nakumpiskar nga ebidensya kontra iti suspek ket positibo a shabu.
