LAOAG CITY – Balligi ti naiyuswat a drug buy-bust operation iti Barangay 23 ditoy ciudad ti Laoag babaen kadagiti kameng ti Phil. Drug Enforcement Unit.
Nabigbig ti subject ti operasyon a ni Eddie Boy Ancheta, agtawen 23, maysa a pintor ken residente iti Barangay 9 ditoy ciudad.
Rumrumuar nga inlako ni Ancheta ti maysa a sachet ti maipagarop a shabu iti police pusuer buyer iti balor a sangaribo a pisos.
Nakumpiskar pay dagiti otoridad manipud kenni Ancheta ti tallo pay a sachet a naglaon ti maipagarop a shabu ken maysa a kalibre 22 a paltog.
Inbatad dagiti otoridad a ni Ancheta ket maibilang nga High Value Individual iti Provincial Level.
Mainaig iti daytoy, inlawlawag na a nakadanon iti Barangay 23 gapo ta agaw-awis ti inom ti binigbig na a “Patricia Santos” a kachat na.
Kunana a nagchat laeng kenkuana ni Patricia gapo ta kayat na nga agbalin da nga agpagayam ken uray nagsend ti ladawan daytoy ket saan na a mailasin.
Segun kenni Ancheta, saan na nga am-ammo ni Patricia ngem nagpagatang ti liempo ken maipagarop a pilpiliten ti maseknan isuna.
Kabayatanna, naglikudan ni Ancheta a naglako isuna ti iligal a droga gapo ta ti laeng iggem na ket ti liempo, cellphone ken ti kwarta na.
Innayon na a saan na nga ammo no apay a tiniliw isuna dagiti otoridad.
Naamoan a ni Ancheta ket natiliw met laeng idi 2021 gapo iti iligal a droga ken nakaruar idi Agosto 2022.
