LAOAG CITY – Inlawlawag ni Atty. Ireneo Kidd Castro, maysa a private lawyer ken professor ditoy probinsya, maipanggep ti makunkuna a persona non grata.
Segun kenkuana, mabalin nga ideklarar kas persona non grata ti maysa nga indibidual wenno diplomat a saan a nasayaat ti ar-aramiden wenno awan ti panangrespetar na iti prinsipyo iti maysa a lugar.
Inbatad na pay a saanen a kasapulan ti agpalawag no apay a nasken nga ideklarar ti maysa a tao wenno diplomat kas persona non grata.
Innayon na a nauneg daytoyen a rason tapno pagawiden ti personalidad a maideklarar kas persona non grata gapu ta saanen a rumbeng nga agtalinaed iti lugar.
Reaksyon daytoy ni Atty. Castro mainaig iti isyu ti Pilipinas ken China no sadinno nga idi laeng Martes, Pebrero 11, indeklarar ti China a persona non-grata dagiti dati ken agdama nga opisyal ti Kalayaan, Palawan karaman ti mayor, bise mayor agingga kadagiti konsehal kalpasan nga immunan nga indeklarar ti persona non grata iti munisipalidad kontra kadagiti opisyal ti Chinese Embassy.
