LAOAG CITY – Napalaos ti panagyaman ni Prof. Zaldy Fernandez iti Mariano Marcos State University (MMSU) iti pannakagun-od na ti umuna a pwesto iti outstanding utilty model category ti UNLAD.
Daytoy ket kabayatan ti 2022 National Invention Contest and Exhibits ti Department of Science and Technology.
Segun ken ni Fernandez, umabot iti maysa a tawen ti panagsagana na para iti inlaban na a Multi-fuel Dryer Utility Model.
Ibatad na a saan a namnamaen a makastrek iti Short List wenno final 5 iti nasao nga exhibit.
Mainaig iti daytoy, inlawlawag ni Fernandez a ti naimbento na a Multi-fuel dryer ket mabalin a mausar ti recycled a ramit kas iti taep, kayo ken dadduma pay.
Kabayatanna, kuna na a saan laeng a para iti panagpamaga ti makan kas iti ikan ti usar ti nasao a model ngem ketdi mabalin a mapagbalin nga oven.
Immunan nga inpakaammo ni Prof. Fernandez a maikatlo a daras a nakisalip iti exhibit sakbay a nagun-od na ti umuna a pwesto.
Nagyaman met ti propesor ken ni Dr. Shirley Agrupis, ti presidente iti MMSU gapu iti napalaos a suporta daytoy.
