LAOAG CITY – Nagkari ni Police Staff Sergeant Erwin Gamet iti PNP-Batac a saan nan ton nga uliten ti pananggandat na a dangran dagiti agkabsat a nangipila ti reklamo kontra kenkuana.
Segun iti maysa kadagiti agkabsat, nupay linayatan laeng isuna ti pulis ket masapol latta nga adda ti pagmennamennaan na iti inaramid na kadakuada.
Gapu iti daytoy, kunana nga adda ti naiyuswat a panagsasarita ken adda ti katulagan a mangipaneknek a ti pulis ket nagkari a saan nan ton nga ar-aramiden ti napasamak.
Inbatad na a patien na nga naaramid laeng ti pulis ti napasamak gapu iti kaadda na iti impluwensiya ti nasanger.
Inlawlawag na a nagbalin nga idolo na pay ti nasao a pulis kas maysa nga agad-adal a mangal-ala ti kurso a Bachelor of Science in Criminology.
Maipalagip a kellaat a sinada ti pulis dagiti agkabsat a Criminology Student ken maysa a Project Civil Engineer iti mannarimaan a kontruksion ti Mariano Marcos Memorial Hospital and Medical Center ken dita a ginandat ti pulis a dangran dagitoy iti saan a masinunuo a rason.
Naammoan nga agkarruba laeng dagitoy iti paset ti Brgy. Capacuan iti ciudad ti Batac.
Kabayatanna, segun ken ni Police Lieutenant Colonel Roger Digmayo, Chief of Police ti PNP Batac, awanen ti sumaruno nga addang nga aramiden da kalpasan iti daytoy.
Saan met a kinumpirmaran ni Digmayo no adda iti impluwensya ti nasanger ni Gamet idi napasamak daytoy.
