LAOAG CITY – Agtultuloy pay laeng ti imbestigasyon ti Philippine National Police (PNP) iti pannakapalto-paltog ti maysa a kameng ti pulisya iti Barangay Saludares iti ili ti Dingras.
Nabigbig ti biktima a ni Police Staff Sergeant Jackson Raymundo, agtawen ti 36, naasawaan, nakabase iti PNP-Dingras ken residente iti Barangay Puttao iti ili ti Solsona idinto a saan pay a nadeterminar ti katatao ti suspek.
Iti inisyal nga impormasyon, nakaawat dagiti personnel ti PNP Dingras ti mensahe seknan iti nadakamat nga insidente.
Naamoan a ti biktima ket maysa nga intelligence officer ti PNP-Dingras no sadinno ket rumrumuar a nakabkabil, nagkaiwara dagiti gamit na ken naitapwak ti lugan na iti irigasyon.
Narekobre met iti nakapasamakan ti krimen dagiti kapsula iti saan pay a nadeterminar a klase ti paltog.
Naduktalan pay a maipagarop a mapukpukaw ti service firearm ti nadakamat a biktima a pulis.
Basar pay iti impormasyon, nakaduty ti biktima ngem nakadanon iti nadakamat a lugar gapo ta adda ti mapan da iberipikar.
