LAOAG CITY – Napaltogan ti maysa a kameng ti Philippne National Police babaen ti pada na met laeng a pulis bayat ti VIP Protection Course da iti Ilocos Norte Police Provincial Office.
Basar iti naipadanon iti Bombo Radyo Laoag nga impormasyon ket manarimaan ti VIP Protection Course dagiti kameng ti pulisya ngem maipagarop nga adda ti bala ti paltog nga inusar ti saanen a nainaganan a pulis.
Gapo iti daytoy ket timmama ti bala iti maysa met laeng a pulis ken dagus met a naitaray iti ospital para iti pannakataming na.
Naamoan a masapol a maileppas dagiti pulis ti training ken seminar dagitoy para iti panangipaay da ti protection dagiti opisyales ti pagilyan.
Inbatad pay ti source ti Bombo Radyo a napilaan ti kaso a Serious Physical Injury ti pulis.
Mainaig iti daytoy, kuna ni Police Major Vencioly Luzano, ti Force Commander ti Provincial Mobile First Company a pakaibilangan ti suspek a pulis ket adda iti restricted area ti Ilocos Norte Police Provincial Office.
Kabayatanna, nagkedked met pay laeng a mangipaay ti naan-anay a detalye ni Police Major Jephre Taccad, ti pannakangiwat ti Ilocos Norte Police Provincial Office.
Innayon ni Taccad, iyuray na ti pammilin ti provincial Director para iti detalye ti pannakapaltog ti pulis.
