LAOAG CITY – Natay ti maysa a pulis kalpasan a napaltu-paltugan idiay Barangay Santiago, Marcos, Ilocos Norte.
Nabigbig daytoy a ni Police Corporal Wilbert Rarogal Jr., residente iti nasao a barangay ken agdama a nakabakasyon ngem nakadestino idiay Kalinga Apayao.
Segun ken ni Police Capt. Johnveil Maramag, ti chief of police iti ili a Marcos, maipagarop a 9mm pistol ti nausar iti pammaltog a napasamak iti oras iti alas-9:30 idi rabii.
Naamoan a mismo a ti kabsat ti biktima ti nakalasin a ti driver ti motorsiklo ket kapitan iti nasao met laeng nga ili ken ti inlubbon na ti nangpalto-paltog ti biktima.
Nakarekobre dagiti kameng ti SOCO iti 13 a kapsula ti 9mm pistol iti nakapasamakan ti krimen, ken maysa a bala ti isu met laeng a paltog.
Agtultuloy ti naiget nga imbestigasyon dagiti otoridad iti napasamak a pammaltog.
