LAOAG CITY – Inbatad ni Bombo International News Correspondent Demetrio Rafanan manipod Italya nga addan ti inparuk-at a baro nga ordinansa ti ministry of health iti nasao a pagilian.
Daytoy ket kalpasan nga adda ti nakumpirmaran a kaso ti baro a variant ti covid-19 nga Omicron.
Kuna na a maisubli iti yellow zone ti rehiyon Friuli nga addaan ti kaso ti Omicron Variant nu sadinno a nasken ti panagisuot ti face mask iti ruar ti pagtaengan.
Immuna iti daytoy, kuna ni Rafanan a ti nabatbati a paset ti pagilian ket adda iti white zone gapu iti panagbaba ti kaso ti covid-19.
Nu pay kasta, maibilang a baro manen a pangta ti omicron variant rason a masapol ti naig-iget a panagannad.
Kabayatanna, kuna ni Rafanan a malaksid iti pannakaipatungpal ti baro nga ordinansa iti maysa a rehiyon ket adda ti walo nga African countries ti saan a palubusan a makastrek iti Italya.
