LAOAG CITY – Kinumpirmaran ni Dr. Rickson Balalio, ti Officer In Charge ti Provincial Health Office nga adda ti nairekord a kaunaan a kaso a pimmusay a maysa a residente ditoy siudad ti Laoag kalpasan a nakagat ti pusa.
Nupay kasta, inbatadna a saanna pay a masinunuo ti pakabigbigan ti nasao a biktima ken no kasano a nakagat daytoy iti pusa.
Malaksid iti daytoy, inpakaammo ni Balalio a manarimaan pay laeng ti panang-consolidate ti report para iti tawen 2023 maipapan kadagiti pannakakagat ti aso, pusa ken dadduma pay a dingwen ditoy probinsia.
Inlawlawagna a dagiti nakagat ket pakairamanan dagiti ubbing ken nataengan.
Inpalgakna a maiyur-uray pay laeng ti datos manipod kadagiti nagduduma nga ili ken siudad ditoy probinsia.
Mainaig iti daytoy, inpanamnamana nga adda ti umdas a suplay ti bakuna kontra iti rabies.
Kunana a mabalin nga agturong dagiti maseknan a biktima ti rabies iti Animal Bite Center iti Governor Roque Ablan Senior Memorial Hospital no sadino amin a bakuna ket maipaay a libre.
Segun ken ni Balalio, mabalin nga agturong kadagiti Animal Bite Center iti alas otso ti bigat agingga alas singko ti malem ngem no emerhensia ket mabalin nga agturong kadagiti emergency room iti amin nga ospital ditoy probinsia.
Naammoan nga adda ti 14 a kaudian a kaso ti rabies a naimaldit iti panagngudo ti tawen 2023 ditoy probinsia.
Kabayatanna, maibilang ti Ilocos Norte nga addaan ti kangatoan a kaso ti rabies iti intero a rehion uno iti napalabas a tawen.
