LAOAG CITY – Naglikudan ti maysa a residente a ni Ms. Vicky Bersamin iti Barangay Mangato-B ditoy siudad ti Laoag ti reklamo kenkuana nga agparparugit ti tarakenna nga aso iti asideg iti pagtaengan ti karrubana a ni Mr. Andres Garo.
Segun kenkuana, saanna nga iranranta nga agrugit ti tarakenna nga aso iti sakupen ti solar ti pagtaengan ni Garo.
Mainaig iti daytoy, inpakaammo ni Garo a nagturong daytoy ken ni Barangay Chairman Lito Miguel tapno i-report daytoy nga parikotna ngem arig saan nga ikankano ti Kapitan ti reklamona.
Gapu iti daytoy, nagturong pay iti City Health Office ni Garo tapno ipakaammo daytoy a banag no sadinno nga insigida a nagtignay ti nasao nga opisina tapno ballaagan ni Bersamin ken napatawan ti first offense.
Naammoan a saan laeng a naminsan a daras ti panagparugit ni Bersamin iti tarakenna nga aso iti asideg ti pagtaengan ni Garo no diket namin-adu a daras daytoyen a mangitunda ti nabangsit nga angot.
Maipalagip nga inaprobaran ti Sangguniang Panlungsod ti gakat ni Konsehal John Michael Fariñas, Chairman ti Committee on Environment a mangmandar kadagiti indibidual nga akopen nga insigida ti rugit dagiti tarakenda nga aso, pusa ken dadduma a dingwen kadagiti pampubliko a lugar ditoy siudad ti Laoag.
Immuna iti daytoy, inpakaammo ni Dr. Samantha Licudine, mangidadaulo ti City Veterinary Office a ti maipataw a pannusa kadagiti saan a mangsurot iti pagannurotan ket maibasar iti Oplan Dalos Code a ti 1st offense ket saan a nababbaba ngem sangaribu a pisos ken mabailud ti saan a sumurok ti lima nga aldaw; ti 2nd offense ket mamulta ti saan a nababbaba ngem dua a ribu a pisos ken maibalud ti saan a sumurok ti sangapulo nga aldaw ken ti 3rd offense ket mamulta ti tallo a ribu a pisos ken maibalud ti saan a sumurok ti 15 nga aldaw.
