LAOAG CITY – Inpakaamo ni PCapt. Joseph Calderon a nagsagaba ti sugat iti akin kannawan a paset ti bukod ti biktima ti napasamak a pammagkong iti Barangay Guerrero iti ili ti Dingras.
Binigbig ni Calderon ti biktima a ni Jeric Lumang, residente iti Brgy. Medina idinto a dagiti suspek ket da Charles Justin Talon, residente iti Brgy. Capasan ken ni Rojay Solomon a residente iti Brgy. Parado iti nasao nga ili.
Nu pay kasta, inlawlawag ni Calderon a basar iti pagimbestigar da, naggapo iti maysa a convenient store ti biktima ken ti kadwana a ni Desmark Ramos idi ta sinaruno isuda dagiti suspek.
Inbatad na nga apaman a nagdadanun dagiti maseknan ket dita a nagrarambolda.
Kuna na a kabayatan ti panagrambolda ket dita a nangiruar ti kutsilyo ni Talon ken binagkong na ni Lumang.
Gapu iti daytoy, intaray a dagus ni Ramos ti biktima iti Dingras District Ospital ngem naiyakar iti Mariano Marcos Memorial Hospital iti siudad ti Batac para iti pannaka-agas na.
Mainaig iti daytoy, inpakaamo ti hepe a naipasan iti provincial prosecutors office ti kaso a frustrated homicide kontra kadagiti suspek ken adda ti desisyon iti nasao nga opisina nu maibaba ti maipila a kaso kontra kenni Solomon agsipod ta panagdanog laeng ti naaramat na.
Naamoan nga addan ti dati a riri dagiti agsinnumbangir a partido ken maipagarup a mapangasan ni Solomon kenni Lumang.
