LAOAG CITY – Naglikudan ni Mr. Servillano Tagaca iti Barangay 6 iti ili ti Sarrat nga isuna ti nangpuor kadagiti mula a mahogany iti paset ti Barangay 20 iti nadakamat met laeng nga ili.
Segun kenni Tagaca, idi Mayo 28, aldaw ti Biyernes ket pinuuran na ti innumong na a siit ken sinigurado na nga awan ti apoy wenno asok sakbay a nagawid.
Inpetteng na daytoy kalpasan nga adda ti naawat ni Tagaca a summon no sadinno ket isuna ti maitudtudo a nangpuor kadagiti mula a mahogany ti agnagan ti Engr. Orville Ventura.
Masdaaw ni Tagaca nga isuna ti mapabpabasol iti laksid a Mayo 28 idi nagpuor ti siit ken Mayo 30 idi napuuran dagiti mahogany.
Gapo iti daytoy, naawat na ti summon idi Hunyo 3 ken nagsasarita da iti barangay idi Hunyo 5.
Innayon na a ti maibagbaga a rason nga isuna ti napabasol iti pannakapuor dagiti mahogany ket gapo ta maipagarop a nagayam ti pinuuran na a sisiit.
