LAOAG CITY – Nagreklamo ti maysa a bumarangay iti Barangay 34-B Gabu ditoy ciudad ti Laoag nga awan ti naawat na a kwarta a tulong manipud kadagiti opisyal kalpasan ti panagbisita da Sen. Bong Go ditoy probinsya.
Segun iti saanen a nagpabigbig a residente, adda ti naawat na a relief goods ngem awan a pulos ti cash nga inted dagiti national officials.
Inlawlawag na nga idi mapan na kuma alaen ket naibaga kenkuana a maipagarop a napukaw dagiti papel a mapirmaan tapno makaawat dagiti residente.
Inbatad na pay nga arig na pagpipinnasaan dagiti sumagmamano nga opisyal ti barangay isuna a saan a nakaawat gapo ta ibaon da iti sabali nga opisyal.
Naamoan a naibaga pay kenkuana nga agpasensya isuna ngem inpetteng na a saan a mabalin.
Kabayatanna, inlawlawag ni Barangay Chairman Rodel Legazpi iti nasao a barangay ti reklamo seknan iti saan a pannakawaat ti tulong pinansyal a kabarangayan na.
Segun kenni Legazpi, naipalubos kadagiti maseknan nga iti balay da ti pagpirmaan da ken mapan da ited kenkuana rason a sagsagainnet ti maala na a papel a napirmaan.
Inbatad na nga idi agibunong dan ket naggugudwaan na kadagiti kagawad ngem maipagarop a dimmarop dagiti residente rason iti pannakupukaw dagiti dadduma a “green card”.
Inpetteng na nga awan ti nabatbati a kwarta gapo ta ti grupo ni Sen. Bong Go ti mismo a nagiwayat iti tulong pinansyal.
Kunana pay a saan na a malagip nga insubli ti maseknan a residente ti pinirmaan na a wagas tapno makaala ti tulong pinansyal.
