LAOAG CITY – Dead on arrival iti Governor Roque Ablan Senior Memorial Hospital (GRASMH) ti maysa a lalaki kalpasan a nabagko-bagkong iti Barangay 54-B, Camanggaan ditoy ciudad ti Laoag.
Nabigbig ti biktima a ni Ferdinand Pagaduan Cabel, agtawen ti 32, salesman, awanan ti asawa ken residente iti Barangay 15, San Jose iti ili ti San Nicolas idinto a ti suspek ket ni Jardi Lucban y Dorotan, agtawen iti 37, naasawaan, security guard ken residente iti Barangay 21, San Marcos iti ili ti Sarrat.
Iti imbestigasyon, naggiinom ti biktima ken suspek, kadwa da dagiti innem a kaubraan da iti balay ni Mr. Dante Suguitan Pascua iti Barangay Camanggaan ditoy ciudad ti Laoag.
Naamoan a kabayatan ti panagiinom dagitoy ket adda ti saan a nagkinnaawatan ti biktima ken suspek a nangitunda ti napasamak a pammagkong.
Naitaray ti biktima iti nasao nga ospital ngem naideklara a dead on arrival gapu kadagiti sinagaba na a lima a sugat iti akin-kannigid a barukong na, maysa iti akin-kannawan a barukong na ken maysa ti bukot na.
Nagtalapwagaw met a dagus ti suspek babaen ti panaglugan na ti motorsiklo kalpasan ti pammagkong.
