LAOAG CITY – Balligi ti naisayangkat a Search Warrant Operation nga inpatungpal ti Philippine National Police iti ili ti Solsona.
Binigbig ni P/Cpt Randy Damo, hepe ti Philippine National Police ti subject ti search warrant operation a ni Clifford Pascua, agtawen ti 44, naasawaan ken residente iti Brgy. Mariquet iti nadakamat nga ili.
Nakumpiskar dagiti otoridad ti maysa a 357 cal nga addaan ti innem a live ammunition ken maysa a M67 hand fragmentation granade a nakitada iti maysa a balik-bayan-box.
Inyatnag ni Hon. Myra Sheila Nalupta, Executive Judge Regional Trial Court ti warrant ket gapu iti panaglabsing ni Pascua iti R.A. 10591 wenno Illegal Possession of Firearms and Ammunition, idi Agosto 2, 2024.
Naammoan nga agpapaay kas seaman ti subject no sadinno kababbabana laeng daytoy.
Innayonna nga adda ti naaawatda nga report a maipagarup nga itugtugot ti subject ti ikotna nga illegal a paltog nangruna no mapan daytoy a makisugal.
Kinunana nga ado dagiti naawawat a reklamo maipanggep iti subject ngem agpatingga laeng daytoy iti biang ti barangay.
Kabayatanna, nasayaat ti pannakaiyuswat ti operasion ken awan ti nausar a nalabes a puersa wenno kinaranggas.
