LAOAG CITY – Sumango ti dua a counts ti Resistance and disobedience to a person in authority ti natiliw a security guard kalpasan nga inreklamo dagiti kameng ti Philippine National Police ditoy ciudad ti Laoag.
Ti natiliw a security guard ket agtawen ti 52, agpapaay iti Motion Hardware, retirado a Philippine Army ken residente iti Barangay Barbar iti ili ti Pinili idinto a dagiti nagbalin a biktima na ket da Police Staff Sergeant Pasion ken ni Patrolman John Vincent Iddo nga agpada a kameng ti Philippine National Police ditoy ciudad ti Laoag.
Basar iti report, nagresponde dagiti kameng ti pulisya iti kasera ti suspek iti Barangay 20 ditoy ciudad kalpasan a naireport ti maipagarop a panagprob-probokar na.
Naamoan nga iti panagresponde dagiti otoridad ket saan latta a nagpakaanawa imbes ket kinarit na pay da Police Staff Sergeant Pasion ken ni Patrolman John Vincent Iddo rason nga inarestar da daytoy ken pinilaan ti reklamo.
Iti agdama ket nagtalinaed ti suspek iti kwerpo ti pulisya ken maiyur-uray ti commitment order manipod iti korte para iti pannakaipisok na iti Bureau of Jail Management and Penology (BJMP) ditoy ciudad ti Laoag.
