LAOAG CITY – Irekreklamo ni Mr. Inincencio Baldeloza Sr., residente iti ili ti Bacarra ni Brgy Kagawad Vicente Cadileña iti Barangay Daripdip iti ili ti Pasuquin kalpasan a maipagarop a pinagsawsaw-an na daytoy.
Segun kenni Baldeloza, napasamak daytoy bayat ti panagay-ayam da ti billiards idi laeng kalman.
Inlawlawag na a nagdesisyon nga agpusta daytoy ti 20 a pisos bayat ti panagay-ayam na ken ti asawa ti kagawad ken iti ummuna ken maikadua a laban ket inabak na ti maseknan.
Kunana nga iti naudi nga ay-ayam ket inabak na ti maysa a babai iti 50 a pisos agingga a maipagarop a kinarit isuna dagiti agasawa nga ipusta da amin a kwarta da.
Nupay kasta, saan a kinayat ni Baldeloza ngem ditoy metten a maipagarop a pinagsawsaw-an isuna ti kagawad iti agkakadakes a sarita.
Dinakamat na pay a maipagarop a kayat ti barangay kagawad a danugen isuna iti laksid nga awan met ti basol na.
Inpetteng na nga ado met ti nakakita ngem ammo na nga agkakadwa dagitoy rason nga idi nagsinnungbat da iti barangay kagawad ket pimmanawen iti nasao a lugar.
Mainaig iti daytoy, inbatad dagiti nakasarsarita grupo ti Bombo Radyo Laoag iti Barangay Darapidip a dagiti laeng nagay-ayam idi kalman ken dagiti ubbing ken awan met ti komosyon a napasamak.
Kabayatanna, ikarkarigatan met ti Bombo Radyo nga alaan ti komento ti maseknan a kagawad ken kasta pay ti kapitan iti nasao a barangay.
